U 5 di agustu dû 1906 nascìu Ettore Majorana, ca pi so mpurtanti travagghi comu fìsicu e pa so lesta scumparsa addivintò na liggenna.
I so travagghi cchiù mpurtanti foru ncapu i forzi ca tèninu fermu u nùcliu atòmicu: Majorana fu u primu a pinzari ca prutuna e niutruna ntiraggìsciunu grazzi a forzi di scanciu – unu dî principi ca stannu sutta u studiu ncapu l’enirgìa nucliari.
Nnô marzu dû 1938, mentri ca viaggiava di Nàpuli a Palermu, Majorana un si vitti cchiù e di tannu nuddu l’attruvò.
Assà parraru ncapu a so morti: cu dici ca s’ammazzò, cu parra di na fujuta e àutri di ritiru nnô cunventu, ma ancora oji nuddu sapi comu jeru i cosi.
