U 7 di uttùviru 1937 murìu a 67 anni l’atturi di tiatru Angelo Musco.
Nascìu e criscìu a Catania, d’unni turnò â spiḍḍuta dâ so vita. Figghiu di putijaru, accuminciò a travagghiari pi campari di quann’era picciriḍḍu, comu scarparu, varberi e macari manuvali.
Avi di quann’era nicu ca u so amuri veru era u tiatru. A sìdici anni accuminciò a travagghiari pâ cumpagnia di l’òpira dî pupi di Micheli Insanguine.
Doppu ca travagghiò dintra assai tiatri siciliani, trasìu nnâ cumpagnìa di Giuvanni Grassu. Di ccà, a so carrera addivintò sempri cchiù mpurtanti.
Nnô 1912 funnò a so cumpagnìa travagghiannu cu Ninu Martogghiu. Macari Pirandellu ci detti na manu d’ajutu, scrivènnuci na pocu di cummedi. Musco murìu lassannu na ridità granni a tuttu u tiatru sicilianu.
