Jornu 15 di maju dû 1849 arricurdamu a fini dâ nnipinnenza dâ Sicilia, doppu ca l’esèrcitu dî Burbuna trasìu nnâ cità di Palermu, e astutò a rivuluzzioni.
A nostra ìsula arriniscìu a arristari nnipinnenti pi n’annu, grazzi â rivuluzzioni dû ’48, ca partìu ‘n Palermu tannu a jinnaru, e accussì potti accuminciari a “primavera dî pòpuli” nna l’Europa sana.
Quannu turnaru i Burbuna ‘n Sicilia s’arrivò a l’esiliu e macari â morti dî cristiani ca cummatteru pâ libbirtà, cû focu dâ nnipinnenza ca s’aḍḍumò ancora cchiôssai.
